我家並不是看了上方連結才去內地求診，而是我得知家人選擇帶她去廣州而不是深圳醫院，
我才開始上網搜尋資料，那我也分享帶阿媽上廣州的經驗。
先講價錢，
- 手術費+住院費「三萬」，出院時退回2千多元(用剩的費用)。
- 早午晚三餐是唔包，但醫院有合作飯店，每天可掃碼訂餐明天的三餐，
16蚊少肉多菜，25蚊有肉有菜，或自己叫「美團」，自己到醫院門口攞飯。 - 術後看護，約￥340/日 是一對一24小時，￥140/日是一個護工照顧多個病人，
每兩小時巡查一次，可以用電話聯絡過黎幫手(去廁所)。 - 一間病房通常是三人、兩人病房，病房內有廁所，廁所內有浴室，病人通常來自四湖五海，
家屬都自帶被褥，床架，24小時住在醫院，在病房中的廁所洗澡刷牙，醫院晚上八點後也會開放租床架和被褥，
床架和被褥是分開計費，忘了各自是多少，但兩樣加埋總共￥17/日，
早上約AM7:30醫生會巡房，所以早上7點，護士會進來叫家屬收起床架被褥。 - 坐高鐵到廣州來回的費用
- 我唔迫住醫院，自己租民宿，二百幾蚊一日，租了14天
這家醫院的付錢流程是這樣的，入院時先付￥5000，這就像在醫院開了一個含有五千元的阿媽戶口，
在醫院中，醫生，謢士幫你做什麼、給你吃了什麼藥、檢查了什麼，全部費用
都會從這個戶口一一扣除，如果戶口沒錢，他們會停止一齊動作。
一開始是要先去醫院掛號問診(手機預約)，就像從前香港的什麼補習天王社，
門口一堆補習老師海報和介紹，每位醫生的掛號價錢都不一樣，價錢/職位由底到高，
我們選了骨科院長，300幾蚊掛號費 (事後住院時，聽到好多人話因為知道院長大名，先山長水遠帶阿媽黎)，
但300幾蚊又唔會講多啲嘢，同埋佢唔講/唔識粵語，講幾句就叫你去照X光，照完返去，醫生就講，膝頭好唔掂，要做手術先好得番，即刻安排入院，不過因為阿媽仲要係香港搞吓啲牙(有蛀牙不能做手術，蜅牙後一個月後才能做手術)，我們一個月後才回去安排入院。
----------------------------
入院和手術的整個流程是 --
第一天「入院」
第二天「整天做各種檢查」
第三天「手術」
第四天「要開始做物理治療(運動隻腳)」
第五天「醫生開始想趕你出院，問你想幾時出院」
...........(每天重複，都有物理治療師幫阿媽做幾吓，吊下鹽水，止痛水)
第九天「手術後休息一星期出院 (正常出院時間)」
-----------------------------
第一天
冇咩事，入院，交訂金，等床位，因為我們說了阿媽只懂粵語，不會聽和講普通話，
我媽病房三個床位，三位阿媽各自是三個廣東地區方言，但家屬都會講白話(廣東話)，
這段時間大家都成為戰友，然後被告知明天早上5:00AM要去做檢查，需要家屬陪同。
(她們家屬睡病房，我租了附近民宿住)
第二天
點解檢查要家屬陪同? 因為醫院唔會幫你推阿媽去檢查，只會有領航員通知你做檢查和帶你們到檢查中心，檢查完後要自己回病房，我看見有些病友不能下床，需直接連人帶床去檢查，
只看見一個家屬推住病床左撞右撞...... 然後整天都要檢查，抽血，因為第三天就要做手術。
第三天 - 六天
正常本來要做手術，但病房中的三位阿媽都驗出有問題，手術需要延後幾天。
術前護士都會提醒你記得交齊錢，咁即係要交多少? 後來問醫生才知，術前支付全款。
然後護士又會提我們需要買術後用品，便盆、毛巾、護墊、水墊。
便盆是術後不能下床幾天大小便用，
護墊拿來防污，不過我媽都沒弄污過，
水墊擺在腰下舒緩，
毛巾是術後早午晚敷冰時，將毛巾放在冰袋上。
第七天(手術當天)
阿媽各項指標都合格，可以做手術，半身麻醉。
做手術前請先支付全數手術費 ( 三萬 =￥5000訂金 + ￥25000)，即術前要再支付￥25000。
做完手術後，會有謢工問你要不要請護工，像上面說過，￥140每兩小時查看你一次，
平時可以打電話叫護工黎幫手，她們都識廣東話，會問你想請幾多天，即時支付全部費用，
請幾多天就因人而已.....
術後當天，護工值得請，因為每兩小時要轉阿媽身體，包括晚上，又幫阿媽小便大便，斟茶遞水。
第二天開始就唔駛轉身體，但第二~三天，幫阿媽去大小便很有用，
但我媽第四天阿媽已經可以走圍行，她唔慣被人服侍，要自己去廁所，咁再請看護都無意思。
另外，唔知係咪同掛號邊個醫生有關係，我地掛院長號，所以是院長手術團體，
手術主刀是院長，助手是副院長，咁......院長我信是名醫，而副院長除了是一名醫生，是黨成員，陰謀論講.....
無陰謀。
第八天(術後第一天)
都係個啲嘢，吊鹽水，抗生素，止痛，然後護士會要求下床一次，使用四腳拐杖慢慢走小一段，咁代表你可以下床行動，但今天最好唔好行住，然後物理治療師登埸，彎你隻腳V字型(小腿貼緊大腿)，痛唔痛? 一定痛，但物理治療師說，彎到貼近貼的，將來可以踎低，若只彎到L型，只能坐櫈子，你現在願意彎多少，將來就能彎多少。
第九天(術後第二天)
醫生問你想幾時出院...(我想即時出院也行，因為他們需要床位收新病人)，
但不要這麼快走，物理治療師很有用! 術後每天，物理治療師都會教你復康運動，還會管阿媽做運動，
尤其是屈腳，阿媽一定怕痛唔會屈到V字型，至少在院內每天都有治療師屈你到V字，
依家阿媽返到屋企唔承應自己曾經能屈到V字，只提到治療師話屈到L型都得OK......
不管後續阿媽願唔願意練，至少這幾天能學習，記住了一些技巧(他們也有派小冊子，不怕忘記動作)。
第十 ~ 十一天 (術後第三天，第四天)
沒有追加新東西，重複每日療程，只等阿媽恢復力氣就可以出院，
每天早上醫生巡房就好像電視劇咁，一大班醫生跟住個大佬巡房，但每位病人只係檢查幾下，說幾句，我媽病房三位阿媽，醫生有時唔駛一分鐘就巡完，不像電視劇會說個半集。
說起就搞笑，開始是副院長來巡房，問我地幾時出院，我地話商量下先，
下次就院長黎巡房，檢查吓就話康復得很好，可以出院，當然佢無要求我們出院，
不過就好似時時刻刻提你地可以出院，於是阿媽就計劃提早出院。
第十二天 (術後第五天)
昨天和醫生講今天出院，之後就通哂天，護士姐姐都問今天是不是出院，然後今天停哂所有療程，
早上去交費，話用剩二千幾蚊，會沿付款方式退還，然後要求中午12:00前執好嘢離開病床。
如果你想回到家中可立刻使用冰袋和墊腳等東西，應盡早淘寶/拼多多。
第二十二天 (術後第十五天)
(阿媽術後幾天的傷口，用釘的方法封口)
醫生建議每三天洗一次洗傷口，術後14天可拆線，1個月、6個月、12個月復診。
阿媽諗住返香港，馬會可以洗傷口和拆線，返到香港約馬會醫生，醫生就咁講，洗傷口可以，拆線有無醫生紙? 無唔幫你拆，要香港承認的醫生紙，洗傷口護士就話，傷口好乾淨，無流血流濃，其實唔駛洗都無問題.......
拆線最後帶阿媽去深圳香港大學醫院掛號(100蚊)，睇個醫生好乾脆寫紙仔比你揾護士拆線。
-------------------------------------------
唔好問我點解上廣州都唔去深圳，我推介個深圳港大，近啲，但阿媽話廣州骨科聖手，
負責付錢個位都話要上廣州，廣州個間，我上網查過，很差，十個有八個都說差評，
但都是2021年的留言，近年的評價有一，兩個是好評，即係十個人有八個話差，我個人感想，唔差，正常，
護士唔差，病人來自四方，就算來自廣州，幾個鄉下都幾個方言，有啲護士很利害，識幾種方言。
我阿媽話呢間醫院唔錯，好似瑪麗醫院，我心諗「似佢，咁就死得啦!」
嗱，我唔係話瑪麗醫院唔好，它也救了我媽媽很多次，但我心諗，你去到私家醫院，然後讚嘆「呢道好瑪麗醫院。」
咁你去私家醫院，係想佢好瑪麗醫院定好唔似瑪麗醫院? 我唔知。
完
沒有留言:
發佈留言